Yer səthinin çox hissəsini su tutur. Bu nəhəng su sahəsinə Dünya okeanı deyirlər. Dünya okeanında böyük quru parçaları - materiklər və daha kiçik quru parçaları olan adalar yerləşir.

Materiklər hər tərəfdən okean suları ilə əhatə olunmuşdur. Altı materik var: Avrasiya, Afrika, Şimali Amerika, Cənubi Amerika, Avstraliya və Antarktida.

Avrasiya ən böyük materikdir. Ən kiçik materik isə Avstraliyadır. Adaların sahəsi materiklərlə müqayisədə çox kiçikdir.

Ekvator xətti Yer kürəsini iki bərabər hissəyə bölür. Ekvator sözünün mənası «tənbölən» deməkdir. Ekvatordan yuxarı hissədə quru sahələr daha çoxdur. Çünki Avrasiya və Şimali Amerika materikləri, Afrika materikinin çox hissəsi, Cənubi Amerika materikinin bir hissəsi ekvatordan yuxarıda yerləşir. Yerindən asılı olaraq materiklərin üzərinə düşən günəş enerjisi eyni deyil. Onları əhatə edən okeanlar da müxtəlif xüsusiyyətlərə malikdir. Bütün bunlar materiklərin bitki və heyvanlar aləminə böyük təsir göstərir.

Ən isti ərazilər Afrika materikindədir.

İl ərzində ən çox yağıntı düşən ərazilər Cənubi Amerikadadır. Burada qalın meşələr var. Avstraliya isə quru iqlimə malikdir. Avstraliyada elə heyvanlar yaşayır ki, digər materiklərdə bu heyvanlara rast gəlmək olmur. Kenquru, vəhşi it dinqo və ördəkburun kimi maraqlı heyvanların vətənidir.

Ən soyuq materik Antarktidadır. Qar və buzla örtülmüş bu materik pinqvinlərin vətənidir.