Fəsillər dəyişdikcə gah gecələr, gah da gündüzlər uzanır. Payızda və qışda gecələr uzun olur. Yazda və yayda isə gündüzlər uzun olur.

Qışdan sonra yaz gəlir. Havalar tədricən qızır. Təbiət yavaş-yavaş canlanır. İnsanlar palto və kürkləri çıxarırlar. Xalqımız bahar fəslini çox sevir. Novruz bayramı baharın gəlişi şərəfinə qeyd edilir.

Yazı yay əvəz edir. Yay ilin ən isti fəslidir. Yayda məktəblər bağlanır. Şagirdlər tətilə buraxılırlar. Yayı uşaqların istirahət fəsli də adlandırmaq olar.

Yurdumuzun payızı da gözəl olur. Payızda havalar sərinləşir. Meyvələr yetişir, yarpaqlar tökülür. Ağaclar soyunur, insanlar isə isti geyimlərə keçirlər.

Qış ən soyuq fəsildir. Biz qış fəslini də xoşlayırıq. Çünki qışda çox sevdiyimiz qar yağır. Qışda torpaq dincəlir. Bir çox heyvanlar qış yuxusuna gedir.

İlin fəsilləri hər yerdə nəzərəçarpacaq dərəcədə hiss edilmir. Yerin elə guşələri var ki, orada həmişə isti, ya da əksinə, həmişə soyuq olur. Məsələn, cənub qütbündə Antarktidada buz və qar heç vaxt ərimir. Şimal qütbündə də onun kimi. Ancaq isti Afrikada insanlar qarın nə olduğunu bilmirlər. Haradasa aramsız leysan yağışlar yağır, səhralara isə yağıntı demək olar ki, düşmür.